Allt stefnir í að Hannes Þór Halldórsson, skrifi undir hjá Val á dögunum. Þar með fær Valur, besta markvörð Íslands í sínar raðir. Hannes rifti samningi sínum hjá Qarabag, í Aserbaídsjan í dag. Rætt var um málið í Dr. Football í dag.
Fyrir er Valur með Anton Ara Einarsson, sem var frábær sumarið 2017. Anton fann ekki sitt besta form í fyrra en Valur reyndi að framlengja við hann í vetur.
Samkvæmt Hjörvari Hafliðasyni, bauð Valur þessum öfluga markverði góðan samning. Anton vildi hins vegar hærri laun og það varð til þess að Valur „reif“ samninginn.
,,Samningaviðræður tóku langan tíma, samkvæmt mínum heimildum buðu Valsmenn honum mjög glæsilegan samning. Anton var alltaf að neita og vildi meira og meira, Valsmenn tóku samninginn af borðinu og rifu hann,“ sagði Hjörvar í þætti dagsins.
Valur er það félag sem hefur mesta fjármagnið á Íslandi og virðast leikmenn, reyna að nýta sér það.
,,Leikmenn eru farnir að koma fram við mitt gamla félag eins og Sparisjóð, sjúga hverja einustu krónu þarna. Það er stolt í Val, þeir tóku samninginn í burtu. Allar líkur á að Hannes sé að koma. Þeir héldu áfram að ræða við Anton í byrjun árs.“
Anton verður samningslaus í haust og ef fram heldur sem horfir, þá yfirgefur hann herbúðir Vals.
Dr. Football má heyra hér að neðan.