Manchester United gæti reynt að ráða Mike Phelan til starfa endanlega í sumar er nýr knattspyrnustjóri verður ráðinn.
Phelan hefur verið aðstoðarmaður Ole Gunnar Solskjær síðustu vikur og hefur gengi liðsins verið gott.
Það er talið mjög líklegt að Solskjær fái starfið endanlega en hann fékk aðeins samning út tímabilið til að byrja með.
Phelan hafði starfað í Ástralíu áður en hann kom aftur til Englands en hann er yfirmaður knattspyrnumála hjá Central Coast Mariners.
Phelan hefur engan áhuga á að segja skilið við það starf og vonast til að geta gert bæði á sama tíma.
,,Þetta snýst allt um hvernig hlutirnir ganga fyrir sig á næstu tveimur mánuðum,“ sagði Phelan.
,,Það er mikið að gera hjá United þessa stundina en tímabilið er að enda í Ástralíu svo um leið og ákvörðun hefur verið tekin á Englandi þá munm við hefja viðræður við Mariners á ný og vonandi getur samstarfið haldið áfram.“
,,Það er ýmislegt sem getur gerst en ég væri svo sannarlega til í að halda áfram að starfa með Mariners.“