Hörður Snævar Jónsson skrifar frá París:
Kylian Mbappe er einn allra efnilegasti leikmaður heims en hann spilar með Paris Saint-Germain. Mbappe er aðeins 20 ára gamall en er þrátt fyrir það orðinn fastamaður hjá PSG og franska landsliðinu.
Hann lék með Frakklandi gegn Moldavíu í undankeppni EM á föstudag en Frakkar unnu 4-1 sigur. Undir lok leiksins varð Mbappe sér til skammar er hann reyndi að fiska vítaspyrnu á markvörð heimamanna.
Mbappe lét sig augljóslega detta innan teigs og fékk í kjölfarið gult spjald fyrir dýfuna. Þetta er ekki í fyrsta sinn á tímabilinu sem Mbappe lætur sig falla í grasið við enga snertingu og vonandi þá losnar hann við þennan ósið.
Franksir blaðamenn liggja nú á landsliðinu og spyrja mikið um dýfur Mbappe. Hugo Lloris, fyrirliði liðsins þurfti að svara fyrir þetta á fréttamannafundi í dag, daginn fyrir leikinn gegn Ísland.
,,Við vitum allir hversu góður Mbappe er, hann er frábær leikmaður. Hann er samt bara ungur drengur,“ sagði Lloris.
,,Hann hefur þroskast mikið, hann virðir liðsfélaga sína. Han hefur metnað, hann hagar sér alltaf vel í landsliðinu.“
,,Það er eðlilegt að fjölmiðlar fylgist mikið með hans leik, hann hefur ótrúlega hæfileika. Við reynum að hjálpa honum.“
Didier Deschmaps, þjálfari Frakklands sagðist ekki hafa rætt málið við Mbappe.