Aganefnd KSÍ kom saman síðdegis í gær og fjallaði þar um mál Þórarinns Inga Valdimarssonar leikmanns Stjörnunnar. Þórarinn Ingi hefur beðist afsökunar á fordómafullum ummælum sem hann lét falla í garð Ingólfs Sigurðssonar í leik Stjörnurnar og Leiknis um helgina. Aganefndin hefur ákveðið að dæma Þórarinn í aðeins eins leiks bann.
Þórarinn lét niðrandi ummæli falla um andlega heilsu Ingólfs sem vakti athygli fyrir nokkrum árum þegar hann steig fram og ræddi opinskátt um baráttu sína gegn kvíða og þunglyndi enn hann hefur lengi glímt við kvíðaröskun. Ingólfur þótti mikið efni þegar hann var að stíga sín fyrstu skref á knattspyrnusviðinu. Í leiknum nú um helgina missti Þórarinn eins og áður segir stjórn á sér. Sagði Þórarinn að Ingólfur ætti að hugsa um andlega heilsu sína og mun hafa uppnefnt hann í kjölfarið með vísun í veikindi hans. Heyrði dómari leiksins hvað Þórarinn sagði og var umsvifalaust vísað af velli.
,,Aga- og úrskurðarnefnd KSÍ ákvað að aðhafast ekki frekar vegna brottvísunar Þórarins Inga Valdimarssonar í Lengjubikarnum. Hann lét ljót orð falla í garð andstæðingsins Ingólfs Sigurðssonar. Hjó hann þar í andleg veikindi Ingólfs en Ingólfur var svo hugrakkur að ræða þau mál við Orra Pál Ormarsson í Sunnudagsmogganum á sínum tíma,“ skrifar Kristján Jónsson í Morgunblaðið í dag.
,,Þorvaldur Árnason, dómari leiksins, kemur vel út úr þessu atviki því hann rak leikmanninn af velli þegar hann heyrði hvers eðlis munnsöfnuðurinn var. Ég er nú ekki viss um að fólk verði eins hrifið af framgöngu aganefndar í málinu. Ekki er svo sem víst að refsigleði skili neinu en þarna hefði verið hægt að setja einhvers konar fordæmi og senda skilaboð um að slík framkoma sé alvarlegri en eins leiks bann. Engu máli skiptir þótt mönnum sé heitt í hamsi í íþróttaleikjum. Veikindi sem menn glíma við koma málinu bara ekkert við þótt mönnum kunni að lenda saman í keppni. Ekki frekar en litarháttur, kynhneigð, trú eða eitthvað annað.“
Dómurinn vakti athygli en margir bjuggust við því að KSÍ tæki harðar á málinu og að Þórarinn myndi fá lengra bann.
,,Á tyllidögum þykist knattspyrnuhreyfingin standa sameinuð gegn einelti og kynþáttafordómum samkvæmt auglýsingaherferðum og ýmislegt fleira fallegt verður maður var við í orði. En hvernig birtist sú samstaða okkur?.“
Kristján tekur fram eitt dæmi sem gæti svipað til þess sem átti sér stað um helgina.
,,Varðandi úrskurðinn þá hefur sjálfsagt verið erfitt fyrir aganefnd að finna fordæmi. Eina atvikið sem ég mundi eftir í gær sem líkist þessu var þegar Hirti Júlíusi Hjartarsyni og Guðmundi Mete lenti saman í bikarleik. Hjörtur sagði í Kastljósviðtali að hann hefði sagt „Tyrkja-djöflinum að drulla sér heim“ eða eitthvað í þá áttina. Sagði Hjörtur Guðmund, sem á tyrkneskan föður, hafa hótað sér ofbeldi áður en þessi orð féllu. Ég fékk Google-veldið til að hjálpa mér í gær og fann út að Hjörtur fékk tveggja leikja bann fyrir ummælin.“
,,Ef til vill skiptir mestu máli fyrir Ingólf að Þórarinn segist hafa beðið hann afsökunar að leiknum loknum. Ekki er annað að sjá en að Þórarinn iðrist þess sem hann sagði og lærir vafalaust mjög af því að misstíga sig með þessum hætti.“
