Hörður Snævar Jónsson skrifar frá Peralada á Spáni:
,,Það er kominn tími á að vinna fótboltaleiki, ég skynja mikið hungur í hópnum, rífa sig í gang. Finna þessa tilfinningu sem fylgir því að vinna leiki fyrir landsliðið,“ sagði Hannes Þór Halldórsson, markvörður íslenska landsliðsins. Íslenska liðið hefur leik í undankeppni EM á föstudag, liðið heimsækir þá Andorra.
Hannes fékk að vita það í síðustu viku að enginn vafi væri á því í huga Erik Hamren, hann væri áfram fyrsti kosturinn í mark landsliðsins.
,,Þetta er öðruvísi, ég hef haft þessa leiki sem ákveðinn endapunkt á undirbúningstímabili sem ég hef verið í. Ég hef miðað allan minn undirbúning til að vera klár hérna, auðvitað er gott að fá traustið rétt áður en við hittumst. Þá veit ég hvar ég stend.“
Hannes hefur fyrir síðustu undankeppnir, hengt upp myndir af þeim markmiðum sem hann hefur. Hann heldur því áfram og hefur sett upp myndarlegan vegg á æfingasvæði Qarabag, í Aserbaídsjan.
Fyrir Heimsmeistaramótið í Rússlandi var Hannes með mynd í svefnherberginu, heima en nú er veggurinn á æfingasvæðinu.
,,Ég er með alls konar drasl upp á vegg, við þurfum að hanga svo mikið á æfingasvæðinu. Ég er með mynd af fjölskyldunni og það er EM merkið líka, það er partur af markmiðunum.“
Viðtalið við Hannes er í heild hér að neðan.