Paul Merson, fyrrum leikmaður Arsenal, kom sér í fréttirnar á dögunum en hann opnaði sig í sjónvarpsviðtali.
Þar sagðist Merson vera vafinn skuldum en hann er veðmálafíkill. Hann hefur glímt við þessa fíkn í mörg ár.
Merson var giftur Lorraine Costin í tíu ár en þau voru saman fyrir aldamót. Líf þeirra var ekki alltaf dans á rósum.
Merson eyddi sjö milljónum punda í veðmál, drykki og í spilavítum, eitthvað sem Lorraine komst ekki að fyrr en of seint.
Henni þykir enn vænt um fyrrum eiginmann sinn í dag og er reiðubúin að hjálpa honum ef þess þarf.
,,Ég vissi ekki hvar Mers væri staddur í lífinu en það er eitthvað dýpra sem hann þarf að takast á við,“ sagði Lorraine.
,,Ég myndi elska að fá mér sæti með honum og ræða málin því ég vil hjálpa honum.“
,,Við höfðum aldrei áhyggjur af peningamálum því hann borgaði sínar skuldir. Ef þú ert veðmálafíkill og færð 10 þúsund pund á viku þá ertu að fara eyða 10 þúsund pundum.“
,,Ég var ekki einu sinni reið þegar ég komst að því hversu miklu hann hafði eytt. Ég var bara hjálparlaus.“
,,Við giftumst þegar við vorum mjög ung, við eignuðumst börn og áttu gott líf saman vegna fótboltans.“
,,Það var þó alltaf ákveðið vandamál sem var í gangi á bakvið tjöldin. Það er erfitt að búa með einhverjum sem er fíkill, sérstaklega þegar ég var svona ung. Ég hafði ekki upplifað neitt sjálf.“
,,Hann var ekki svona þegar við giftumst. Þegar vandræðin byrjuðu þá hélt ég að ég gæti breytt honum. Ég blekkti sjálfa mig og hélt að ég væri sú sem myndi koma honum í lag.“