Einn Íslendingur kemst á lista yfir 25 efnilegustu leikmenn Skandinavíu en þessi listi var birtur í kvöld.

Leikmenn á borð við Martin Odegaard (Real Madrid), Sander Berge (Genk) og Erling Haland (RB Salzburg) skipa efstu sætin.

Íslendingurinn umtalaði er hinn efnilegi Alfons Sampsted sem er 21 árs gamall bakvörður IFK Norrkoping. Hann er í 10. sæti listanns.

Alfons kannast flestir knattspyrnuaðdáendur við en hann var lánaður til Breiðabliks í Pepsi Max-deildinni í sumar.

Alfons hefur verið hjá Norrkoping frá árinu 2017 og var einnig lánaður til IF Sylvia og Landskrona.

Hann á að baki tvo deildarleiki fyrir sænska liðið og mun reyna að vinna sér inn sæti í liðinu á næstu leiktíð.

Alfons vakti fyrst athygli með Blikum hér heima og vakti athygli sænska liðsins sem samdi við hann til ársins 2020.

Annar leikmaður sem spilar á Íslandi er á listanum en það er vængmaðurinn Martin Kuittinen.

Kuittinen er fæddur árið 1997 en hann gekk í raðir Víkings Ó. í apríl frá portúgalska liðinu Sintrense.

Finninn spilaði 17 leiki með Víkingum í Inkasso-deildinni í sumar og skoraði í þeim tvö mörk.