Pétur Viðarsson, er þekktastur fyrir afrek sín á knattspyrnuvellinum með FH en hann hefur nú lagt skóna á hilluna. Síðustu 18 mánuði hefur hann staðið í veitingarekstri. Pétur keypti Pylsubarinn sem er þekktur staður í Hafnarfirði, staðurinn opnaði fyrir 30 árum.
„Ég var með ákveðnar hugmyndir sem ég ætlaði að gera í veitingarekstri. Og svo kom þetta tækifæri upp óvænt og mér fannst þetta eiginlega of spennandi til að sleppa því. Þetta er sögufrægur staður í Hafnarfirðinum,“ sagði Pétur í Landanum á RÚV um helgina.
Það vakti athygli á dögunum þegar Pétur sem er 32 ára gamall ákvað að hætta í fótbolta, hann hefur alla tíð spilað með FH fyrir utan eitt ár í Víking. Hann var afar sigursæll á ferli sínum. Það er aðeins öðruvísi að afgreiða pulsur og hamborgara en að að sparka í bolta.
,,Það tók smá tíma að læra allt, setja sinnepp á pulsuna og svona. Það er aldrei eins, maður er alltaf að gera eitthvað nýtt.“
Hafnfirðingar eru afar duglegir að heimsækja staðinn. ,,Þetta er sögufrægur staður í Hafnarfirði, ég á minningar héðan í gamla daga með ömmu og afa. Þau bjuggu hérna rétt fyrir ofan, sem krakki kom maður og fékk samloku og franskar. Mér fannst þetta geggjað tækifæri, að taka við þessu.“