Einar Þór Sigurðsson skrifar frá Istanbúl:
Çağlar Söyüncü, miðvörðurinn öflugi í liði Tyrkja, hefur heldur betur slegið í gegn með Leicester í ensku úrvalsdeildinni.
Söyüncü er ekki vanur því að sjá leikmenn andstæðingsins skora enda hafa Tyrkir aðeins fengið á sig þrjú mörk í undankeppni EM og Leicester er það lið í ensku úrvalsdeildinni sem fengið hefur á sig fæst mörk, eða átta talsins í 12 leikjum. Er það meðal annars frábærum varnarleik Söyüncü að þakka.
Þessi 23 ára leikmaður fór rólega af stað með Leicester eftir komuna frá Freiburg í Þýskalandi sumarið 2018. Harry Maguire var enda fastamaður í liði Leicester en eftir að hann var seldur til Manchester United fyrir metfé í sumar fékk Söyüncü tækifærið.
Á blaðamannafundi Tyrkja í gærkvöldi fyrir leikinn gegn Íslandi sagði Söyüncü að Tyrkir ætluðu sér að tryggja sætið á EM í kvöld.
„Það verður frábær stemning á vellinum og við erum tilbúnir. Allt frá fyrsta degi hefur stjórinn (Senol Gunes) sagt að EM 2020 væri markmiðið. Nú er eitt skref eftir og við viljum ná góðum úrslitum. Það skiptir máli fyrir okkur að ná efsta sætinu,“ sagði Söyüncü en Tyrkir og Frakkar eru með jafn mörg stig í efstu tveimur sætum riðilsins. Tyrkir eru þó ofar vegna betri árangurs í innbyrðis viðureignum liðanna. Svo lengi sem þeir vinna síðustu tvo leiki sína, gegn Íslandi og svo Andorra, vinna þeir riðilinn.
Á blaðamannafundinum var Söyüncü spurður út í velgengnina með Leicester í vetur. „Allt frá því ég kom til Leicester hefur markmið mitt verið að bæta mig, hvort sem ég spila eða ekki. Ég beið eftir mínu tækifæri og lagði hart að mér. Ég þarf að halda áfram að bæta mig. Leicester gengur vel um þessar mundir, ég spila í góðri deild með góðum leikmönnum og góðum liðum,“ sagði hann.
Söyüncü var svo spurður út í góðan árangur Tyrkja í undankeppni EM og hver lykillinn að góðum árangri væri. „Andinn í hópnum er góður og við vinnum vel sem lið. Við verjumst vel saman og sækjum vel saman. Góður árangur í vörninni er ekki bara öftustu fjórum að þakka. Við verjumst vel sem lið.“