Einar Þór Sigurðsson skrifar frá Istanbúl:

Tyrkir spila gegn Íslendingum á hinum magnaða leikvangi Turk Telekom Stadium á morgun. Þessi völlur er algjört vígi, tekur rúmlega 52 þúsund áhorfendur og er heimavöllur stórliðsins Galatasaray.

Tyrkir hafa ekki spilað marga leiki á þessum magnaða velli á undanförnum árum og raunar verða liðnir 1.825 dagar frá síðasta leik Tyrkja á vellinum þegar flautað verður til leiks gegn Íslandi, eða rétt um fimm ár.

Tyrkir spiluðu síðast á vellinum gegn Kasakstan í undankeppni EM 2016. Sá leikur fór fram í nóvember 2014 og endaði hann með 3-1 sigri Tyrkja. Alls hafa Tyrkir spilað sjö leiki á vellinum frá árinu 2011. Fjórir leikir hafa unnist, tveir tapast og einn endað með jafntefli.

Fyrsti leikurinn var vináttuleikur gegn Eistlandi sem vannst 3-0. Því næst vannst sigur gegn Kasökum í undankeppni EM 2012, 2-1. Svo tapaðist leikur gegn Þjóðverjum, 3-1, í sömu keppni áður en 1-0 sigur vannst á Aserum. Tyrkir töpuðu svo 3-1 gegn Króatíu. Allir þessir leikir fóru fram árið 2011. Næst spiluðu Tyrkir vináttuleik við Dani árið 2012 sem endaði 1-1. Síðasti leikurinn var svo fyrrnefndur leikur gegn Kasökum árið 2014 sem vannst 3-1.