Breiðablik er í viðræðum við þjálfara um að taka við karlaliði félagsins, eins og fram hefur komið ræða Blikar við Óskar Hrafn Þorvaldsson, þjálfara Gróttu.
Talið er að Óskar Hrafn taki við Blikum á allra næstu dögum, hann hefur unnið magnað starf með Gróttu en tekur skrefið nú í næsta besta lið landsins, síðustu tveggja ára.
,,Það eru viðræður í gangi, þetta fer vonandi að taka á sig mynd,“ sagði Eysteinn Pétur Lárusson, framkvæmdarstjóri Breiðabliks við 433.is í dag en vildi lítið annað gefa upp þegar við ræddum við hann í dag.
Það eru talsvert af verkefnum sem Óskar þarf að leysa fyrst um sinn í Kópavogi, hér að neðan eru fimm sem ættu að vera ofarlega á blaði. Taki hann við liðinu.
Velja sinn markvörð
Breiðablik samdi við Anton Ara Einarsson í sumar, hann kemur frá Val og mun keppa við Gunnleif Gunnleifsson um stöðuna. Miðað við leikstíl Óskars er líklegra að hann velji Anton, hann er betri í löppunum. Óskar vill spila út frá markverði, ekki er hins vegar einfalt mál að horfa fram hjá einum besta markverði Íslandssögunnar
Búa til leikstíl
Eitt af því sem rætt var í stjóratíð Ágúst Gylfasonar, var að liðið hefði ekki neinn leikstíl. Óskar Hrafn hefur sína hugmyndafræði sem virkaði hjá Gróttu, ansi líklegt verður að teljast að hann reyni að koma sama plani inn í Breiðablik
Losa nokkra leikmenn
Breiðablik vill keppa um titla en félagið vill ekki hafa eldri leikmenn sem leggja lítið á borðið, ef marka má ástæður þess að Ágúst Gyflason er ekki áfram. Þórir Guðjónsson og Arnar Sveinn Geirsson eru menn sem eru sagðir til sölu. Það væri í takt við hugmyndafræði Breiðabliks og Óskars.
Leysa bakvarðarvandræði:
Jonathan Hendricx fór og Davíð Ingvarsson fékk ekki fullt traust, Alfons Sampsted kom svo um mitt sumar og leysti margt. Óskar þarf að leysa stöðuna, líklegt er að Blikar reyni að fá Alfons heim frá Svíþjóð og að Davíð fái traustið vinstra megin.
Kveikja líf í góðum leikmönnum
Damir Muminovic, Elfar Freyr Helgason og Gísli Eyjólfsson eru dæmi um menn sem eiga mikið inni, miðað við frammistöðu sumarsins. Óskar þarf að kveikja neistann í þeim, þá eiga Blikar að geta fengið miklu meira út úr Viktori Karli Einarssyni.