Arnar Þór Viðarsson, þjálfari U21 landsliðsins, svaraði fyrir sig á dögunum eftir gagnrýni sem hann fékk eftir 5-0 tap gegn Svíum.
Arnar ræddi við blaðamenn eftir 1-0 sigur á Írum en eftir tapið gegn Svíum þá fékk hann gagnrýni frá umboðsmanninum Guðlaugi Tómassyni.
Arnar sagðist hafa mun meira vit í þjálfunarfræðum en ‘einhver umboðsmaður’.
Sérfræðingarnir í hlaðvarpsþættinum Dr. Football sendu Arnari væna pillu í þætti dagsins.
Þeir Hjörvar Hafliðason, Mikael Nikulásson og Kristján Óli Sigurðsson fara þar yfir knattspyrnu bæði hér heima og erlendis.
,,Það var eitt sem kom mér mjög á óvart eftir leik að Arnar Viðarsson sem hefur komið ferskur inn í íslenskan fótbolta fór að kvarta yfir að Guðlaugi Tómassyni,“ segir Hjörvar í þættinum.
,,Hann var bara að segja sína skoðun eftir 5-0 tap á móti Svíum og í staðinn fyrir að gera eins og Dr. Football gerir að vaða í boltann þá fer hann beint í manninn: ‘ég veit meira en þessi umboðsmaður.’
,,Við töpuðum 5-0 gegn Svíum, auðvitað má segja eitthvað. Ætlar hann að fara að eltast við alla sem segja eitthvað? Það þögðu allir yfir þessu tapi.“
Kristján Óli var á sama máli og Hjörvar og segir að hann megi ekki við því að svara öllum þeim sem henda í gagnrýni.
,,Ég ætla að vona að hann svari höfðingjanum næst, Arnar Þór, drullaðu þér í gang. Maður svarar ekki svona bulli. Við hugsum um okkur sjálfa og áfram gakk.“