Peter Crouch, fyrrum landsliðsmaður Englands, er heppinn að vera á lífi eftir atvik sem kom upp árið 2009.

Crouch var þá í rómantísku fríi ásamt eiginkonu sinni Abbey Clancey en hún er einnig þekkt fyrirsæta.

Crouch segir frá því í nýrri bók að þau hafi næstum látið lífið er þau skelltu sér út á sjó í eitt skipti.

,,Ég hafði reddað litlum mótorbát fyrir okkur tvö og við settum akkerið niður hjá Porto Cervo til að fá smá sól,“ sagði Crouch.

,,Við opnuðum kampavínið og vorum bara í sólbaði þarna áður en við tókum eftir því að veðrið hafði allt í einu versnað verulega.“

,,Ég reyndi að draga akkerið upp en gat ekki haggað því og svo þegar ég setti í bakkgír þá gerðist ekkert. Við urðum mjög hrædd.“

,,Vindurinn sneri okkur í hringi og við vorum nálægt því að klessa beint á klettana fyrir framan okkur.“

,,Bráðlega þá voru fleiri holur í fingrunum mínum en í reipinu. Það var blóð í bátnum og hræðsla um borð.“

,,Ég veit ekki hvort við hefðum látið lífið ef við hefðum klesst á klettana en það hefði ekki gert mikið fyrir útlitið.“