Helgi Sigurðsson er nýr þjálfari meistaraflokks ÍBV karla en þetta staðfesti félagið í dag.
Helgi hefur undanfarin ár þjálfað lið Fylkis en nýlega var það gefið út að hann héldi ekki áfram þar.
ÍBV hélt blaðamannafund í Eyjum í dag þar sem ráðning Helga var staðfest. Ian Jeffs verður honum til aðstoðar.
Helgi skrifar undir þriggja ára samning við ÍBV og það er stefnan að koma liðinu upp í efstu deild næsta sumar.
ÍBV féll úr efstu deild í sumar og mun því leika í Inkass-deildinni að ári.
,,Þetta er stórt tækifæri. Það verða allir að róa í sömu átt til að fá fólkið hér í Eyjum til að vera stolt af liðinu sínu. Við gefum allt í þetta, ég veit að þetta er erfitt verkefni,“ sagði Helgi.
,,Þetta verkefni heillaði mig og ÍBV er klúbbur sem á sér góða sögu. Það hefur alltaf verið gaman að koma hingað.“