Íslenska landsliðið er komið aftur á flug og íslenska þjóðin fylgir með, strákarnir unnu góða heimasigra á Albaníu og Tyrklandi í undankeppni EM. Liðið á góðan möguleika á að komast á þriðja stórmótið í röð.
Íslenska landsliðið hafði verið í lægð síðast haust, en lærisveinar Erik Hamren eru að finna vopn sín. Sálfræðingur er nú með liðinu þegar það kemur saman, honum tókst að stuða leikmenn liðsins.
Sálfræðingurinn fór yfir þrjá stóra landsleiki liðsins, tvo magnaða leiki liðsins en líka 4-0 tap gegn Frakklandi í mars. Það stuðaði íslenska hópinn.
,,Við erum með sálfræðing, í landsliðinu núna. Hann var búinn að fara yfir þrjá leiki hjá okkur, ég veit ekki hvort ég megi segja þetta. Ég læt þetta flakka,“ sagði Aron Einar Gunnarsson, fyrirliði liðsins við Milliveginn.
Sálfræðingurinn hafði farið vel yfir tvo stærstu leiki liðsins og þar kom í ljós ótrúlegur munur.
,,Hann var búinn að fara yfir leikinn við England á EM, Argentínu á HM og svo Frakkland núna í mars. Hann setti það bara niður, hvernig líkamstjáning og bendingar, búinn að telja allt.“
,,Það var svo mikill munur á þessu, England og Argentína 48 tjáskipti þar. Svo voru bara 8 í leiknum við Frakkland, þar töpum við 4-0 og vorum lélegir. Þar var farið að hugsa að tapa ekki of stórt, menn fóru inn í sig í stað þess að tjá sig og leiðbeina. Það var gott að sjá það svart á hvítu, að menn voru ekki samstíga.“
Aron Einar segir að þessi fundur hafi stuðað leikmenn liðsins, komið þeim á tærnar fyrir leikina tvo í Laugardalnum. ,,Það stuðaði okkur, góður fundur.“
Viðtalið við Aron er í heild hér að neðan.
