Hlaðvarpsþátturinn, 90 mínútur heldur áfram á fullu fjöri en um er að ræða þátt sem Hörður Snævar Jónsson, ritstjóri 433.is stýrir.

Þátturinn hefur notið mikilla vinsælda en afar áhugaverðir gestir hafa komið í þáttinn.

Gestur þáttarins að þessu sinni er Arnar Þór Viðarsson sem átti magnaðan feril sem atvinnumaður, hann var elskaður og dáður hjá þeim félögum sem hann lék fyrir.

Arnar hefur búið erlendis í 22 ár en er mættur aftur heim. Hann er nú þjálfari U21 árs landsliðsins og var í vikunni ráðinn yfirmaður knattspyrnumála hjá KSÍ.

Arnar spilaði í frægum leik gegn Frökkum er Ísland rétt tapaði 3-2 í undankeppni EM árið 1999.

Frakkar voru þá með eitt allra besta landslið heims og höfðu stuttu áður fagnað sigri á heimsmeistaramótinu.

Guðjón Þórðarson var þá landsliðsþjálfari Íslands en hann þjálfaði liðið frá 1997 til 1999 og tók svo við Stoke City.

Arnar er mikill aðdáandi Guðjóns og fer yfir hvernig honum leið fyrir leikinn gegn stórliði Frakklands eftir fund með Guðjóni.

,,Ég sat á bekknum í fræga leiknum, 3-2. Það var var algjört ævintýri að vera í þeim hóp,“ sagði Arnar.

,,Ég var bara ungur drengur þannig lagað, að vera vitni af Gaua Þórðar tímabilinu. Gaui var snillingur.“

,,Á þeim tíma, ég mun aldrei gleyma því, þeir voru ný orðnir heimsmeistarar og fyrir þann leik að sitja á fundum með Gaua Þórðar og heyra hann tala um Didier Deschamps, Desailly, Zidane og alla þessa gaura, þetta voru aumingjar.“

,,Þeir gátu ekki neitt! Þeir voru annað hvort over the hill eða þeir nenntu þessu ekki eða þeir voru búnir að vera meiddir.“

,,Ég fór útaf fundinum og hugsaði með mér að við værum að fara að vinna þennan leik, að þeir gætu ekkert. Gaui Þórðar var ógeðslega góður í þessu.“