Fernandinho, leikmaður Manchester City, var alls ekki sáttur í gær eftir leik liðsins við Tottenham.

Um var að ræða leik í Meistaradeild Evrópu en City vann viðureign gærdagsins 4-3 á heimavelli.

Það reyndist hins vegar ekki nóg því Tottenham vann fyrri leikinn 1-0 í London og fer áfram á mörkum skoruðum á útivelli.

Á 93. mínútu í leik gærdagsins þá skoraði Raheem Sterling fimmta mark City og brutust út mikil fagnaðarlæti.

Stuttu seinna var markið hins vegar dæmt af vegna rangstöðu og ljóst að City var úr leik í keppninni.

Það var myndbandstækninni VAR að þakka að markið var dæmt af en aðstoðardómarinn flaggaði ekki til að byrja með.

Fernandinho var spurður út í eigin líðan eftir leikinn og hafði ekki mikið að segja við blaðamenn.

,,Til fjandans með VAR,“ sagði Fernandinho og gekk í burtu þrátt fyrir að dómurinn hafi augljóslega verið réttur.

Tottenham fer áfram í undanúrslit keppninnar og spilar þar við Ajax í næstu umferð.