Gylfi Þór Sigurðsson komst á blað fyrir lið Everton í dag sem mætti Chelsea í ensku úrvalsdeildinni.

Gylfi lék allan leikinn fyrir heimamenn í dag en liðið vann góðan 2-0 sigur og fékk stigin þrjú.

Íslenski landsliðsmaðurinn steig á vítapunktinn í seinni hálfleik en Kepa Arrizabalaga varði frá honum í markinu.

Gylfi náði þó frákastinu og skaut boltanum örugglega í netið og kom Everton í 2-0.

Þetta var 12. mark Gylfa í deildinni á tímabilinu en hann er markahæsti leikmaður Everton.

Gylfi hefur aldrei skorað eins mörg mörk í efstu deild áður en hann náði mest 11 með Swansea.