Guðni Bergsson, vann sannfærandi sigur þegar kosið var um formann KSí á ársþingi sambandsins í dag. Geir Þorsteinsson bauð sig fram gegn sitjandi formanni.

Geir Þorsteinsson fékk 26 atkvæði en Guðni Bergsson fékk 119. Tveir skiluðu auðu. Guðni fékk 82 prósent atkvæði.

,,Þetta var slæmt tap í dag, ég er samt í góðu skapi,“ sagði Geir um niðurstöðuna.

,,Það er greinilega ykkar mat að ég eigi heima með Eggert og Ellerti,“ sagði Geir og átti þar við Eggert Magnússon og Ellert B Schram sem eru einnig heiðursformenn.

Geir var formaður sambandsins í tíu ár en lét af störfum fyrir tveimur árum, framboð hans um að snúa aftur fékk ekki gott brautargengi hjá aðildarfélögum KSÍ.

Guðni tók við starfinu fyrir tveimur árum og hefur nú endurnýjað umboð sitt, hann mun því sitja hið minnsta í fjögur ár sem formaður.

Geir er heiðursformaður KSÍ en hann fékk þá nafnbót fyrir tveimur árum. Hann verður áfram slíkur.

Nokkur hiti var í aðdraganda kosninga en að lokum var það Guðni sem hafði betur en vel var mætt á ársþingið sem fram fer á Hilton hótelinu í Reykjavík.