Guðni Bergsson, formaður KSÍ þarf að laga ýmislegt í starfi sínu ef hann ætlar að halda starfi. Þetta var mat sérfræðinga Dr. Football, sem er hlaðvarpsþáttur sem Hjörvar Hafliðason stýrir.
Stærsta kosningamál Guðna var að ráða inn yfirmann knattspyrnumála þegar hann kom til starfa í febrúar árið 2017.
Ekki hefur gengið að fá það í gegn en kosið verður aftur til formanns í upphafi næsta árs. Sögur eru á kreiki um að leitað sé að sterkum frambjóðanda til að fara gegn Guðna.
,,Þessu var lofað í janúar á síðasta ári, núna er september árið 2018. Miðað við það sem ég hef heyrt, þá er Rúnar ekki að taka við,“ sagði Hjörvar í Dr. Football.
,,Það er nýtt ársþing í byrjun næsta árs, verður Guðni ekki að ráða þennan mann inn?.“
Mikael Nikulásson, sérfræðingur þáttarins tók í sama streng og hélt því fram að Guðni þyrfti að laga ýmislegt.
,,Guðni þarf að gera ýmislegt núna, þetta er ekki eina málið sem hann þarf að redda. Hann þarf að rífa sig upp af rassgatinu. Hann fær stórt mótframboð, það kemur gæi inn í janúar í þetta starf. Þá verða það bara ég eða Stjáni, Íslendingur sem er ekki að fara að gera neitt. Ekkert alvöru nafn.“
,,Ég held að Jón Rúnar og þessir hákarlar fari aftur á móti Guðna með alvöru mann, hann þarf að passa sig til að halda starfinu. Ég held að enginn hafi haft trú á því að þetta myndi verða.“
Kristján Óli Sigurðsson, sérfræðingur Hjörvars í þættinum tók í sama streng.
,,Ef ég væri fulltrúi liðs sem kaus Guðna í síðustu formanns kosningum, þetta var hans stærsta mál að ráða inn í þetta starf. Mæta þarna og ekkert hefur gerst, myndi ég kjósa Guðna aftur? Ég stórefa það.“