Pepsi deild karla er á enda um næstu helgi en Valur er í efsta sæti og mætir Keflavík í síðustu umferð.
Breiðablik og Stjarnan þurfa að treysta á að Valur tapi gegn Keflavík sem hefur ekki unnið leik í sumar.
Mætingin á leiki sumarsins hefur ekki verið eins góð og vonir stóðu til, félögin hafa reynt sitt besta til að fá fólk á völlinn, án árangurs.
Rætt var í Harmageddon á X977 um ástæðu þess en þar var Þorkell Máni Pétursson með í umræðu, hann er rödd Pepsi deildarinnar þetta sumarið.
,,Við erum með þrjú lið sem geta orðið meistarar í síðustu umferð,“ sagði Þorkell Máni og átti þar við um Val, Breiðablik og Stjörnuna.
Hann fór síðan að ræða aðsóknina á leiki deildarinnar og ástæðu þess.
,,Aðsókn er að droppa enn eitt árið, hefur það ekki eitthvað með að gera hvernig fótbolti er spilaður í þessari deild?.“
,,Það er eitt og hálft lið sem er ekki að liggja aftur á vellinum, það er Valur og FH. Önnur lið eru að liggja til baka, það er rosalega erfitt að hafa gaman af fótbolta þegar tvö lið eru að mætast með það leikplan, að liggja til baka. Veðrið gæti líka hafa dregið úr aðsókn.“