Jurgen Klopp, stjóri Liverpool, hefur útskýrt það af hverju hann tók Xherdan Shaqiri af velli í hálfleik gegn Southampton í dag.

Shaqiri þótti standa sig afar vel í fyrri hálfleik í 3-0 sigri Liverpool og átti þátt í tveimur mörkum liðsins.

Það kom mörgum á óvart að Klopp hafi tekið Shaqiri af velli en hann vildi taka yfir leikinn enn frekar í síðari hálfleik.

Stuðningsmenn ræddu sín á milli af hverju Shaqiri væri fórnað eftir svo góðan fyrri hálfleik en Klopp útskýrði málið eftir leik.

,,Ég sagði við Shaq að þetta væri í fyrsta sinn sem ég tæki leikmann af velli sem gerði svo mikið í fyrri hálfleik en við vildum meiri stjórn,“ sagði Klopp.

,,Shaq er frábær strákur. Aukaspyrnan hans var frábær. Hann reyndi allt sem hann gat og það er gott að hafa hann. Hann er frábær sóknarlega en þarf að bæta sig aðeins varnarlega.“