Cristiano Ronaldo er genginn í raðir Juventus á Ítalíu en hann kemur til félagsins frá Real Madrid. Real staðfestir þessar fregnir í dag.
Ronaldo gaf það út eftir úrslit Meistaradeildarinnar í maí að hann væri mögulega á förum.
Juventus hefur nú tryggt sér þjónustu Ronaldo en félagið borgar 105 milljónir punda fyrir framherjann.
Ronaldo hefur leikið með Real frá árinu 2009 en hann gerði garðinn frægan með Manchester United fyrir það.
Portúgalinn hefur átt ótrúlegan feril en hann gerði 311 mörk í 292 deildarleikjum fyrir spænska stórliðið.
Ronaldo vann allt mögulegt á Spáni og hefur fengið Ballon d’Or verðlaunin fimm sinnum frá árinu 2008.
Juventus er sterkasta lið Ítalíu en liðið hefur unnið deildina sjö ár í röð.