Við búum langt norður í hafi, erum þannig séð einangruð og fámenn þjóð og veðrið á Íslandi er ekki alltaf gott. En það er eitt sem við getum huggað okkur við og það er sú staðreynd að við eigum bestu nágranna í heimi.

Færeyingar hafa alltaf staðið við bakið á Íslendingum og þeir standa svo sannarlega við bakið á strákunum okkar sem nú keppa á heimsmeistaramótinu í Rússlandi.

Meðfylgjandi myndband var tekið undir lok leiks Íslands og Argentínu í miðbæ Þórshafnar. Fjöldi fólks safnaðist saman til að horfa á leikinn á risaskjá. Í brekkunni mátti sjá íslenska fánann og margir voru í treyjum íslenska landsliðsins. Það var augljóst að Færeyingar vildu íslenska liðinu allt það besta í baráttunni við argentínska risann.

Þegar flautað var til leiksloka og 1-1 jafntefli staðreynd í fyrsta leik Íslands á HM braust út mikill fögnuður hjá færeyskum áhorfendum. Það var augljóst að þeir voru stoltir af frændþjóð sinni og nágrönnum.

Við getum líka verið stolt að eiga svo góða nágranna sem standa með okkur í blíðu og stríðu. Þetta skemmtilega myndband má sjá hér að neðan en undir lok myndbandsins má sjá gleðina hjá færeyskum áhorfendum þegar dómarinn flautaði til leiksloka.

https://www.facebook.com/atlantictogether/videos/1968593703165018/?t=140