Manchester United tekur á móti Liverpool í stórleik ensku úrvalsdeildarinnar á morgun klukkan 12:30.

United situr sem stendur í öðru sæti deildarinnar með 62 stig á meðan Liverpool er í þriðja sætinu með 60 stig og því ljóst að það er mikið undir á morgun.

Síðast þegar að liðin mættust á Anfield lauk leiknum með markalausu jafntefli en Jose Mourinho stillti upp afar varnarsinnuðu liði í leiknum og varðist mjög aftarlega á vellinum.

Dejan Lovren, varnarmaður Liverpool segir hins vegar að hann sé ekki að mæta á Old Trafford til þess að verjast aftarlega heldur vilji Liverpool fá öll þrjú stigin í leiknum.

„Þegar að þeir mættu hérna síðast þá vörðust þeir aftarlega,“ sagði Lovren.

„Þetta snýst kannski um stigið hjá þeim en ekki hjá okkur, við spilum aldrei upp á stigið.“

„Við munum mæta og gera allt sem við getum til þess að vinna leikinn,“ sagði hann að lokum.