Kristján Jónsson, blaðamaður Morgunblaðsins skilur ekki á hvaða vegferð Knattspyrnusamband Íslands er þegar það er að reyna að sækja sér fé í Afrekssjóði ÍSÍ. Úthlutað var úr sjóðnum í vikunni en KSÍ fékk ekki krónu.

KSÍ er lang stærsta sérsambandið innan ÍSÍ og hefur sambandið verið rekið með miklum hagnaði síðustu ár, stærsta ástæðan þar er magnaður árangur hjá karlalandsliði Íslands. Afrekssjóður ÍSÍ útdeilir 350 milljónum króna til sérsambanda vegna ársins 2018 en KSÍ fær að mati ÍSÍ of háa styrki á öðrum stöðum til að réttlæta það að fá úr þessu.

Kristjáni blöskrar að KSÍ sjái ekki í hvaða stöðu sambandið er miðað við önnur sérsambönd sem berjast í bökkunum.

,,Ekki kom það mér á óvart að KSÍ skyldi ekki fá úthlutun úr Afrekssjóði ÍSÍ. Þegar sjóðurinn stækkaði, vegna ákvörðunar þarsíðustu ríkisstjórnar, var sett á laggirnar nefnd undir forystu Stefáns Konráðssonar. Mótaði hún hugmyndir um hvernig heppilegt væri að standa að úthlutun úr sjóðnum og skilaði af sér ágætri skýrslu. Ég man ekki betur en þar hafi verið lögð áhersla á að sérsambönd sem eru sjálfbær fái ekki úthlutun úr sjóðnum. Var KSÍ þar nefnt en einnig voru GSÍ og ÍF nefnd sem sambönd sem væru nærri því að verða sjálfbær,“ skrifar Kristján í bakverði blaðsins í dag.

,,Persónulega skil ég ekki almennilega hvaða hugsun býr að baki því hjá forystufólki okkar í knattspyrnuhreyfingunni að sækja um almannafé þegar ársreikningur sýnir handbært fé á milli 600 og 700 milljónir. Mér þykir rökstuðningur um að ákveðin verkefni séu ekki sjálfbær vera léttvægur.“

,,Ég trúi því varla að stjórnarfólk í KSÍ hafi fjarlægst grasrótina í íslensku íþróttalífi svo heiftarlega að þau komi ekki auga á þetta. Innan KSÍ eru kóngarnir og drottningarnar í íþróttahreyfingunni og þurfa ekki að hafa þær áhyggjur sem aðrir hafa í hreyfingunni. Farsælt kóngafólk ríkir með þeim hætti að stíll sé yfir.“