Það vakti mikla athygli á Stamford Bridge í dag er allt varð vitlaust undir lok leiks Chelsea og Manchester United.

Jose Mourinho, stjóri United, varð mjög reiður eftir jöfnunarmark Chelsea sem Ross Barkley skoraði á 96. mínútu leiksins.

Mourinho var þó ekki reiður vegna marksins heldur vegna þjálfarans Marco Ianni sem er í þjálfarateymi Maurizio Sarri.

Hver er Marco Ianni? Um er að ræða 32 ára gamlan Ítala sem fylgdi Sarri til Chelsea í sumar.

Hann hafði starfað sem tæknilegur aðstoðarmaður Sarri hjá Napoli en þeir unnu saman í heimalandinu í tvö ár.

Ianni ákvað að fagna jöfnunarmarki Chelsea fyrir framan Mourinho sem varð virkilega reiður og ætlaði að ráðast á Ítalann.

Sarri hefur sjálfur sagt að hann ætli að leysa úr þessu máli innan félagsins en sumir kalla eftir því að Ianni verði rekinn eftir atvikið.