Breiðablik hefur tryggt sér sæti í Evrópudeildinni fyrir næsta tímabil eftir öruggan sigur á Fylki í kvöld.
Blikar voru í engum vandræðum með þá appelsínugulu og unnu að lokum sannfærandi 3-0 sigur.
Hér má sjá það góða og slæma úr leiknum.
Plús:
Blikar geta svo sannarlega andað léttar eftir þennan leik. Frábær sigur og Evrópusætið tryggt þegar tvær umferðir eru eftir.
Það var nákvæmlega ekkert hik á Blikum þrátt fyrir að mikið væri undir. Kláruðu leikinn sannfærandi.
Það væri auðvelt að brotna eftir tap í úrslitum Bikarsins en þeir grænu komu sterkari til baka en áður og kláruðu verkefnið.
Arnór Gauti Ragnarsson spilaði síðustu mínúturnar í markinu hjá Blikum! Hann átti eina fína vörslu eftir aukaspyrnu.
Mínus:
Gunnleifur Vignir Gunnleifsson fékk að líta beint rautt spjald hjá Blikum í kvöld. Það er áfall fyrir liðið. Spjaldið fékk hann undir lok leiksins.
Það var mikið í húfi hjá Fylki í kvöld en liðið mætti ekki til leiks. Byrjuðu vel en virtust svo hætta eftir fyrsta markið.
Fylkir er aðeins þremur stigum frá fallsæti þegar tvær umferðir eru eftir, hefðu getað komið sér í góða stöðu með sigri.
Mætingin var mjög léleg í kvöld. Fólk virtist ekki nenna á völlinn og var stemningin mjög takmörkuð.
