Sigurbjörn Hreiðarsson, aðstoðarþjálfari Vals, var alls ekki ánægður í kvöld eftir 3-1 tap gegn Rosenborg í undankeppni Meistaradeildinni.

Það var dæmt víti á Val í uppbótartíma sem Rosenborg skoraði úr og það mark kemur þeim norsku áfram í næstu umferð.

Vítaspyrnan var mjög umdeild og segir Sigurbjörn í samtali við Fótbolta.net að þetta hafi verið kjaftæði og skandall.

,,Maður er alltaf að læra í þessu, þetta er búið núna. Við fáum á okkur þetta víti og hann ætlaði ekki einu sinni að dæma víti þegar hann breytir bendingunni. Fyrir mér leit þetta út fyrir að vera kjaftæði og skandall,“ sagði Sigurbjörn við Fótbolta.net.

,,Hann átti því miður ekki sinn besta dag í þessu og bara ábending til dómara yfir höfuð, menn dæma ekki vítaspyrnu nema þeir séu 100 prósent vissir. Þetta atvik, ég bara trúi þessu ekki.“

,,Við erum úr leik og það er því miður staðreyndin. Það er sorglegt því strákarnir voru öflugir.“