Stjarnan lyfti sér upp í fjórða sæti Pepsi-deildar karla í kvöld er liðið heimsótti topplið Breiðabliks í Kópavoginn.

Stjörnumenn gerðu sér lítið fyrir og lögðu Blika af velli en eina mark leiksins gerði Hilmar Árni Halldórsson úr vítaspyrnu.

Hér má sjá það góða og slæma úr leiknum.

Plús:

Stjarnan er að hitna, liðið er nú bara stigi á eftir toppliði Breiðabliks og deildin heldur áfram að vera jöfn.

Stjarnan tók Breiðablik á hörkunni, spörkuðu hressilega í Blika í upphafi leiks sem fóru inn í skelina.

Kolbeinn Þórðarson er jákvæður hlutur við leik Breiðabliks eftir leikinn, mikill kraftur og gæði í pilti.

Mínus

Ágúst Gylfason verður að hætta með þessa tilraun sína, 3-5-2 kerfið hans hefur ekkert gert fyrir Breiðablik í sumar. Gísli Eyjólfsson nýtist illa og vængbakverðir liðsins gera ekkert gagn.

Það er ljóst að Ágúst treystir hvorki Sveini Aroni eða Hrovje Tokic til að leiða sóknarlínu sína. Arnór Gauti Ragnarsson meiddist og þá kom inn Aron Bjarnason sem var afar slakur sem fremsti maður.

Gunnleifur Gunnleifsson þarf að axla ábyrgð á mistökum sínum í leiknum í kvöld, vítaspyrnan sem hann gaf var klaufaleg. Sparkaðu boltanum bara í burtu, það lærðum við í landsleik Íslands og Noregs í gær. Það er stutt á milli því fram að þessu atviki var Gulli búinn að vera frábær.