Ólafur Jóhannesson þjálfari Vals fær mikinn og góðan lofsöng í hlaðvarpsþætti Vals. Tómas Þór Þórðarson útvarpsmaður heldur mikla og góða ræðu um Ólaf.
Tómas líkir Ólafi við Sir Alex Ferguson gamla stjóra Manchester United. Segir að hann geri hlutina betur en aðrir á mörgum sviðum.
,,Málið er með Ólaf Jóhannesson, hann er að taka yfir þessa deild. Ég er búinn að vera að pæla í þessu, ég gæti ekki verið meira hrifinn af neinum í þessari deild eftir endurkomu hans til Vals og í Pepsi deildina,“ sagði Tómas í Hlaðvarpsþættinum.
,,Mér finnst hann geggjaður, hann er kominn á einhverja minni útgáfu af Ferguson stigi í þessari deild. Ef við tökum frá 1992, Heimir GUðjónsson með fimm titla. Bjarni Jó er með tvo, svo er Skaginn með Gauja Þórðar. Óli Jó er með þrjá Íslandsmeistaratitla með FH og bikarmeistaratitil. Hann byggði upp lið hjá FH sem tók yfir íslenskan fótbolta, vinnur bikar, bikar og Íslandsmeistaratitil með Val. Á síðustu sjö árum í efstu deild hefur hann unnið sjö Íslandsmeistaratitla og þrjá bikarmeistaratitla.“
,,Ég gagnrýndi hann mikið með landsliðið, mér fannst hann geggjaður hjá FH og geggjaður hjá Val. Það er ekki bara fótboltinn sem hann vill spila, hann vill spil sóknarbolta, hann vill vinna með stæl. Stundum þarf að gera þetta ljótt, þá er það gert. Leikmenn vilja spila fyrir hann, síðan hvað hann gerir utan vallar.“
Hann líkir Ólafi við Ferguson í allri þeirri umræðu sem er utan vallar.
,,Svolítið eins og Ferguson, bombar bara út einhverjum hlutum og kemst upp með það. Heldur öllum í skefjum með skemmtilegu sálfræðistríði, er með klukkuna eins og Ferguson. Það er fullt af mönnum sem geta unnið titil, þú þarft að vera eitthvað annað. Þú þarft að vera með eitthvað óútskýrt, með eitthvað annað en hinir hafa.“
,,Það er ekki bara frá keilu til keilu, það er meira en það sem gerist á æfingasvæðinu. Þú þarft að vera þetta. Óli stýrir umræðunni eins og Ferguson, það er frábær hluti fyrir Val. Þetta er það sem leikmennirnir sjá og heyra.“
Hlusta má á hlaðvarpsþátt Vals í heild hér að neðan.
