Luke Shaw, vinstri bakvörður Manchester United er að ganga í gegnum erfiða tíma þessa dagana.

Hann var í byrjunarliði United í 2-0 sigri liðsins á Brighton í enska FA-bikarnum á dögunum en Mourinho ákvað að kippa honum af velli í hálfleik.

Þá gagnrýndi hann leikmanninn eftir leikinn og telja nú flestir að leikmaðurinn eigi sér enga framtíð hjá félaginu.

Vinir og vandamenn leikmannsins eru sagðir brjálaðir út í Mourinho og eru þeir afar ósáttir með hegðun stjórans gagnvart leikmanninum.

„Hvernig Mourinho kemur fram við leikmanninn er fyrir neðan allar hellur,“ var haft eftir einum af vandamönnum Shaw.

„Ef hann er ósáttur með hann þá á hann að láta hann vita af því og halda þessu innan félagsins.“

„Ef svona meðferð ætti sér stað á öðrum vinnustöðum þá væri án nokkurs vafa búið að taka á þessu.“

„Þetta er ógeðsleg hegðun,“ sagði náinn vinur Shaw að lokum.