Trent Alexander-Arnold, bakvörður Liverpool er afar ánægður með Roberto Firmino, sóknarmann liðsins.

Firmino fær ekki alltaf það hrós sem hann á skilið en hann var magnaður í 4-1 sigri liðsins á West Ham um helgina.

Hann hefur nú skorað 21 mark í 36 leikjum fyrir Liverpool á leiktíðinni, ásamt því að leggja upp önnur 9 og segir varnarmaðurinn að hann sé einn mikilvægasti leikmaður liðsins.

„Hann er mjög sérstakur leikmaður. Hann fær klárlega ekki það hrós sem hann á skilið og fyrir mér er hann mjög vanmetinn leikmaður,“ sagði Arnold.

„Hann tengir allt liðið saman. Ekki bara fremstu mennina heldur allt liðið. Hann er okkur ómetanlegur. Hann skorar, leggur upp og býr til færi. Það er erfitt að biðja um eitthvað meira frá honum.“

„Hann vill vinna allt sem í boði og hann er fæddur sigurvegari. Hann er mjög hungraður í árangur og það er mjög mikilvægt að vera með þannig leikmann sem fremsta mann,“ sagði hann að lokum.