Íslenska karlalandsliðið í handbolta tryggði sér í kvöld sæti á EM, sem haldið verður í Króatíu snemma á næsta ári, með öruggum sigri á Úkraínu, 34-26. Þetta var klárlega langbesti leikur íslenska liðsins í háa herrans tíð en Geir Sveinsson hefur verið að byggja upp nýtt landslið sem hefur átt erfitt uppdráttar og lengi vel leit út fyrir að liðinu tækist ekki að tryggja sér sæti á EM-mótinu í Króatíu.
Íslenska liðið hafði frumkvæðið allan leikinn en leikurinn var þó fremur jafn framan af. En frábær kafli undir lok fyrri hálfleiks tryggði væna hálfleiksstöðu, 18:13. Ólíkt því sem við höfum oft vanist slökuðu strákarnir ekki á heldur létu kné fylgja kviði og juku forystuna í síðari hálfleik. Sigurinn var í raun aldrei í hættu, munurinn varð minnstur fjögur mörk en mestur átta mörk og sá munur skildi liðin líka að í lokin.
Margir leikmenn sem hafa átt misjöfnu gengi að fagna undanfarið stigu upp í kvöld og sýndu góðan leik. Mikil ákefð var jafnframt í leik liðsins, bæði í sókn og vörn.
Aron Rafn Eðvarðsson stóð í markinu allan leikinn og átti fínan leik, varði rúmlega 15 skot. Guðjón Valur Sigurðsson var markhæstur með 8 mörk, Ólafur Guðmundsson átti fínan leik og skoraði 5 mörk, Aron Pálmarsson átti líka hörkuleik, skoraði 5 mörk og átti margar stoðsendingar. Arnar Freyr Arnarsson, Rúnar Kárason og Ásgeir Örn Hallgrímsson skoruðu allir 4 mörk hver.
Eins og áður segir: Besti leikur íslenska handboltalandsliðsins síðan Geir Sveinsson tók við liðinu. Svona viljum við sjá ykkur, strákar! Byggjum á þessu og vonandi heldur liðið áfram að sýna framfarir.
Í janúar fær þjóðin enn einu sinni að fylgjast með íslenska handboltalandsliðinu á stórmóti, þegar Ísland keppir á EM í Króatíu.