Framherji Inter Milan er stórtækur í líkamsskreytingum
Mauro Icardi, sóknarmaður Inter Milan, hefur á Instagram-síðu sinni frumsýnt nýtt flennistórt húðflúr sem þekur allan búk hans.
Flúrið er af ljóni með afkvæmum sínum og þekur alla bringu hans og maga auk þess sem þar er að finna nöfn dætra hans, Francescu og Isabellu. Fyrir var argentínski knattspyrnumaðurinn með handleggina rækilega flúraða og því lítið orðið eftir af húð sem ekki er þakin bleki.
Icardi virðist óhræddur við að láta flúra sig þó að knattspyrnuleiktíðin á Ítalíu standi sem hæst, en vinna við þetta tiltekna verk hófst fyrir nærri hálfu ári síðan.
Tattúvinnan hefur þó ekki haft áhrif á Icardi innan vallar þar sem hann er sem stendur næstmarkahæstur í ítölsku deildinni með 24 mörk, einu færra en Edin Dzeko og Andrea Belotti. Lið hans, Inter Milan, hefur þó valdið vonbrigðum í deildinni og vermir 7. sæti deildarinnar. Framherjinn hefur verið orðaður við ýmis félög undanfarið, meðal annars í ensku úrvalsdeildinni.
Hér fyrir neðan má sjá myndband sem Icardi birtir á Instagram.