New England Patriots vann magnaðan sigur á Atlanta Falcons í Super Bowl í nótt, 34-28. Fátt benti til þess að New England myndi hafa betur en ótrúlegur endasprettur skóp magnaðan sigur.
Atlanta byrjaði mun betur og komst í 21-0 í öðrum leikhluta og 28-3 í þriðja leikhluta. Patriots-menn, með Tom Brady og Julian Edelman í broddi fylkingar, neituðu að gefast upp og jöfnuðu þegar 57 sekúndur voru eftir af venjulegum leiktíma.
Framlengja þurfti leikinn og er það í fyrsta sinn sem úrslitin ráðast í Super Bowl í framlengingu. Leikurinn var einnig sögulegur að því leyti að aldrei áður hefur lið unnið Super Bowl eftir að hafa lent 10 stigum eða meira undir. Patriots bætti um betur svo um munar og vann þrátt fyrir að hafa lent 25 stigum undir.
Þetta var fimmti sigur Tom Brady, leikstjórnanda Patriots, í Super Bowl og situr hann nú einn að því meti.
