Liam Kelly þarf að svara til saka hjá enska knattspyrnusambandinu fyrir ofbeldisfulla hegðun
Liam Kelly, fyrirliði Leyton Orient, sýndi af sér óafsakanlega og óíþróttamannslega hegðun í leik gegn Plymouth í ensku fjórðu deildinni á dögunum þegar hann hrinti boltastrák heimaliðsins um koll. Myndband af atvikinu hefur vakið hörð viðbrögð á samfélagsmiðlum í vikunni en Kelly hefur verið ákærður af enska knattspyrnusambandinu fyrir ofbeldisfulla hegðun.
Meðfylgjandi myndbandi er úr leik liðanna á þriðjudagskvöld, sem Leyton vann 3-2. Eitthvað var Kelly að flýta sér og illa fyrir kallaður þegar lið hans fékk hornspyrnu og fannst boltastrákurinn, hinn 17 ára gamli Jake McLean eitthvað lengi að skila af sér boltanum. Eins og sést á myndbandinu virðist McLean vera í þann mund að kasta boltanum til leikmanns Leyton sem er á leið út að hornfána til að taka hornspyrnuna. Kelly veitist að honum og hrindir honum í jörðina.
McLean segir í samtali við enska fjölmiðla að Kelly hafi ekki beðist afsökunar á hegðun sinni, en kallaði þó ekki sérstaklega eftir því að hann hlyti bann fyrir framgönguna.
„Ég upplifði það ekki þannig að ég væri eitthvað svifaseinn, eða að hafa áhrif á leikinn á nokkurn hátt. Þetta var bara algjört virðingarleysi. Ég var bara að reyna að sinna mínu starfi,“ segir sjálfboðaliðinn McLean.
Uppfært: Kelly hefur fengið 6 leikja bann fyrir framkomu sína.