Jón Daði Böðvarsson, leikmaður Wolves og íslenska landsliðsins í knattspyrnu, segir að ræða Lars Laberback fyrir leikinn gegn Englandi hafi blásið mönnum þá trú í brjóst að liðið gæti unnið. Ísland vann eins og frægt er orðið magnþrunginn sigur á Englandi í 16-liða úrslitum EM í sumar, 2-1.
„Ég man að Lagerback sagði, með fullri virðingu fyrir Englandi, að hann hefði aldrei á sínum ferli mætt jafn ofmetnu liði og því enska. Það kom okkur í gírinn, þá vissum við að við gætum unnið þá. Við vissum að pressan væri á Englendingum og svo fór sem fór,“ segir Jón Daði í viðtali við Sky Sports.
Jón Daði ræðirí viðtalinu um allt milli himins og jarðar, allt frá uppvaxtarárunum á Selfossi til spilamennskunnar með Wolves í vetur. Þá talar hann um árangur Íslands á EM í sumar og viðurkennir að hann hafi fundið til með leikmönnum enska liðsins eftir leikinn sögufræga.
„Fólk hélt því fram að þeir hefðu ekki lagt sig fram sem er kjaftæði. Þeir gerðu sitt besta. Fólk virðist gleyma því að íslenska liðið er skipað leikmönnum sem spila í mörgum af sterkustu deildum heims.“
Þá segir Jón Daði að helsta eftirsjáin frá mótinu í sumar sé leikurinn gegn Frökkum í 8-liða úrslitum. Ísland tapaði 5-2 í miklum markaleik og Jón Daði segist enn hugsa um þann leik. „Við vorum með Portúgal í riðli og þeir unnu mótið eftir að hafa lent í 3. sæti í riðlinum. Ég hef oft hugsað með mér: Af hverju fórum við ekki alla leið?“
