Graham Taylor, fyrrverandi landsliðsþjálfari Englands í knattspyrnu, er látinn, 72 ára að aldri. Taylor var landsliðsþjálfari Englands á árunum 1990 til 1993 og þjálfaði einnig lið á borð við Wolves, Watford og Aston Villa á þjálfaraferli sínum. Síðasta félagið sem hann stýrði var einmitt Aston Villa á árunum 2002 til 2003.

Talyor spilaði einnig knattspyrnu sem atvinnumaður á sínum yngri árum; hann lék 189 leiki með Grimsby á árunum 1962 til 1968 og 150 leiki fyrir Lincoln City á árunum 1968 til 1972. Hann lagði skóna á hilluna vegna meiðsla, þrítugur að aldri.

Taylor náði eftirtektarverðum árangri í þjálfun og kom hann Watford til að mynda upp úr fjórðu deildinni í þá fyrstu á fimm árum. Þá kom hann liðinu í úrslitaleik ensku bikarkeppninnar árið 1984. Þaðan lá leiðin til Aston Villa þar sem hann kom liðinu upp í efstu deild á sínu fyrsta ári. Árið 1990 lenti Villa í öðru sæti efstu deildar.

Í kjölfarið kom kallið frá enska landsliðinu og náði Taylor góðum árangri til að byrja með. Enska liðið tapaði aðeins einu sinni í fyrstu 23 leikjum sínum undir stjórn Taylors. Síðan fór að halla undan fæti og komst liðið með naumindum inn á Evrópumótið 1992. Hann lét af störfum í nóvember 1993 eftir að ljóst varð að Englendingar yrðu ekki meðal þátttökuþjóða á HM í Bandaríkjunum 1994.

Taylor var kvæntur Ritu Cowling og eignuðust þau tvær dætur.