Hættur með enska landsliðið eftir uppljóstrun Telegraph – Entist aðeins 67 daga í starfi
„Þetta var kjánalegt af mér,“ sagði Sam Allardyce, fyrrverandi knattspyrnustjóri enska fótboltalandsliðsins, við blaðamenn fyrir utan heimili sitt í Bolton í gærkvöldi. Óhætt er að segja að gærdagurinn hafi verið viðburðaríkur fyrir Sam sem missti starf sitt eftir uppljóstrun breska blaðsins Daily Telegraph.
Sam Allardyce var ráðinn þjálfari enska landsliðsins eftir Evrópumótið í sumar. Á þeim 67 dögum sem Sam entist í starfi stýrði hann enska liðinu í einum leik, sigurleik gegn Slóvökum í undankeppni HM fyrr í mánuðinum.
Sam náðist á myndband samþykkja að taka við 400 þúsund pundum, tæpum 60 milljónum króna á núverandi gengi, frá viðskiptajöfrum frá Austurlöndum. Upphæðina þáði Sam fyrir að aðstoða viðkomandi við að komast fram hjá reglum enska knattspyrnusambandið um félagaskipti leikmanna í gegnum þriðja aðila, en slíkt er með öllu ólöglegt í Englandi. Það sem Sam vissi ekki var að viðskiptajöfrarnir voru í raun blaðamenn á vegum Telegraph.
Sam lét ekki þar við setja því hann gagnrýndi einnig enska knattspyrnusambandið og forvera sinn í starfi, Roy Hodgson, sem hætti með enska liðið eftir tapið gegn Íslandi í 16-liða úrslitum EM í sumar.
Mail Online greinir frá því að Sam muni fá eina milljón punda, um 150 milljónir króna, í starfslokagreiðslur frá enska knattspyrnusambandinu. Hann er nú á leið til Benidorm á Spáni þar sem hann á sumarhús. Í samtali við blaðamenn við heimili sitt sagðist Sam ætla að „slaka á“ og bætti við að hann væri langt því frá hættur afskiptum af fótbolta.
Hann viðurkenndi að hafa sýnt dómgreindarleysi þegar hann þáði umrædda greiðslu. Þá sagðist hann taka afleiðingunum af æðruleysi en sagðist varla geta lýst vonbrigðum sínum með það að hafa nú misst draumastarfið.
Sam sagðist ekki hafa hitt umrædda viðskiptajöfra vegna þeirra peninga sem voru í spilinu. Hann sagðist hafa ætlað sér að aðstoða vin sinn, umboðsmanninn Scott McGarvey, sem hann hefur þekkt í 30 ár.
Ekki liggur fyrir hver tekur við starfinu af Sam, en Englendingar eiga leik gegn Möltu í undankeppni HM þann 8. október næstkomandi.
