Bandaríski sundmaðurinn Michael Phelps er í hópi bestu íþróttamanna sögunnar en kappinn stingur sér ekki til sunds öðru vísi en að vinna eins og berlega hefur komið í ljós á Ólympíuleikunum í Ríó. Phelps vinnur hvert gullið af fætur öðru en í nótt sem leið vann hann sitt 22. gull á þeim fimm ólympíuleikum sem hann hefur tekið þátt í.
Hann sigraði í 200 metra fjórsundi í nótt en þá grein er hann búinn að vinna fjóra leika í röð. Carl Lewis og Al Oerter eru þeir einu sem unnið hafa sömu afrek í langstökki og kringlukasti.
Fern gullverðlaun eru nú þegar komin í hús hjá Phelps sem getur hæglega bætt við þeim fimmtu. Hann er þegar kominn í úrslit í 100 metra flugsundi og fyrirfram telst hann sigurstranglegur í þeirri grein.