Martin Keown, fyrrverandi miðvörður Arsenal og enska landsliðsins, virtist ekki vera í sjöunda himni þegar íþróttafréttamaðurinn Guðmundur Benediktsson missti stjórn á sér þegar flautað var til leiksloka í leik Íslands og Englands á mánudagskvöld.

Síminn birti á Twitter-síðu sinni í gær myndband, sem búið var að texta, sem sýnir Guðmund lýsa síðustu sekúndunum sem voru æsispennandi. Martin Keown var á leiknum og sat hann aðeins örfáum metrum frá Guðmundi þar sem hann lýsti leiknum fyrir lesendur Daily Mail.

Vefútgáfa Daily Mail, Mail Online, fjallar um þetta á vef sínum og gerir góðlátlegt grín að Keown sem er gallharður stuðningsmaður enska landsliðsins, að sjálfsögðu.

Í umfjölluninni kemur fram að Guðmundur hafi vakið mikla athygli fyrir fjörugar lýsingar sínar á mótinu. Fréttin hefur vakið talsverða athygli og hafa margir skrifað athugasemdir við hana. Margir hrósa íslenska liðinu, aðrir hrósa Guðmundi á meðan enn aðrir finna enska landsliðinu allt til foráttu. Einn, sem hrósar Guðmundi, segir til dæmis:

„Hahaha, frábært! Af hverju getum við ekki átt svona lýsendur? Ég vona, vona að Ísland vinni Frakkland í 8-liða úrslitunum. Það væri frábært. ÁFRAM GUMMI!“

Myndbandið má sjá hér að neðan: