Stoltur af liðinu og á von á hörkuleik við Frakka
Guðjón Þórðarson, fyrrverandi landsliðsþjálfari í knattspyrnu, gleðst svo sannarlega yfir árangri íslenska landsliðsins á Evrópumótinu í knattspyrnu í Frakklandi. Guðjón segir að mikil ástríða og styrkur sé uppskrift að góðum árangri og það á við um íslenska liðið í þessu tilfelli. Guðjón var landsliðsþjálfari á árunum 1997-99 og undir hans stjórn var liðið nálagt því að tryggja sér sæti í lokakeppni mótsins sem haldin var í Belgíu og Hollandi árið 2000. Guðjón á einn landsleik að baki sem leikmaður.
,,Ég er ofsalega ánægður með framgöngu liðsins og hún fyllir manni stolti. Þessi árangur kemur mér í sjálfu sér ekki á óvart. Við erum búin að sjá að það er allt hægt og ég held það hafi sannast gegn Hollendingum í forkeppninni hvað býr í íslenska liðinu. Sigur liðsins í Amsterdam var staðfesting á því að liðið hefur yfir að ráða burðum til að fara langt,“ sagði Guðjón Þórðarson.
,,Þróunin hjá liðinu hefur verið jöfn og stígandi og þetta hefur allt farið í sömu áttina. Það er mikið undir og á bak við liðið er frábær umgjörð. Hún gerist varla betri og er í samanburði við bestu lið í heiminum í dag. Það er ekkert sem vantar upp á, leikmönnum líður vel og þeir geisla af gleði. Englendingar búa yfir frábæri umgjörð en það er ekki nóg eins og bersýnilega kom í ljós í leiknum á móti okkur í Nice í gærkvöldi. Það vantar alla ástríðu í enska liðið og þessa þrá til að sigra. Það var stigsmunur á liðunum á vellinum hvað þetta varðar. Íslendingar höfðu ódrepandi vilja og ástríðu til að láta hlutina ganga,“ sagði Guðjón.
Guðjón sagði ennfremur að sparkspekingar og almenningur í Englandi undrast að íslenska liðið skildi ekki hafabrotnað saman eftir að hafa fengið mark á sig svona snemma leiks. Það hafi ekki slegið íslenska liðið út af laginu, það hafi aftur á móti bara eflast. Svipað dæmi hafi komið upp í leiknum á móti Tékkum í forkeppninni. Þá setti íslenska liðið bringuna fram og hökuna upp og réðust á Tékkana.
Hvernig sérðu þú framhaldið hjá íslenska liðinu í keppninni?
,,Leikurinn við Frakka verður erfiður en Frakkarnir hafa á að skipa mun betra liði en Englendingar. Ef við ætlum að ná góðum úrslitum við Frakka þurfum við að eiga betri leik en síðast. Íslenska liðið er á hinn bóginn til alls líklegt. Munurinn á enska og franska liðinu er sá að það eru einstaklingar í franska liðinu sem geta gert hluti upp á eigin spýtur. Það er ennfremur mun meira jafnvægi á Frökkunum og betri samsetning á allan hátt. Viðureignin við Frakka verður því erfið en eins og Íslendingar hafa leikið eru vissulega möguleikar í stöðunni. Ég á von á hörkuleik og við eigum harma að efna á Stade de France, síðast var heppnin með þeim og spurning núna hvort heppnin falli ekki með okkur.“
Frammistaða Íslendinga hefur því fært þér sem öðrum ómælda gleði og ánægju?
,,Já, svo sannarlega. Ég er mikið stoltur af liðinu og framhaldið er óneitanlega spennandi,“ sagði Guðjón Þórðarson.
Frétt uppfærð
DV hefur lokað fyrir athugasemdir við þessa frétt vegna ósæmilegra ummæla sem viðhöfð voru. DV harmar þau og hvetur fólk til að sýna tillitsemi og vanda orðaval sitt í athugasemdakerfinu.
