MMA-kappinn Gunnar Nelson berst sem kunnugt er í kvöld við Albert Tumenov. Gunnar mun þó stíga inn í hringinn undir öðru lagi en hann hefur gert hingað til og hefur kappinn skipt út laginu Leiðin okkar allra, með hljómsveitinni Hjálmum, fyrir annað íslenskt lag.
Þetta kemur fram á vef MMA-frétta.
Í kvöld mun lagið Way Down We Go með Kaleo hljóma þegar Gunnar stígur í hringinn. Gunnar hafði notast við lag Hjálma síðan árið 2012 en nú mun nýtt lag heyrast. Bardaginn fer fram í Rotterdam í Hollandi í kvöld og er sýndur í beinni útsendingu á Stöð 2 Sport. Útsending hefst klukkan 18.