Zlatan Ibrahimovic vildi ekki svara því hvort hann myndi ganga í raðir Manchester United í sumar eins og rætt hefur verið um. Allt bendir til þess að Jose Mourinho taki við United-liðinu á næstu dögum en Mourinho var stjóri Inter þegar Zlatan var leikmaður félagsins.
Á blaðamannafundi í morgun var Zlatan spurður hvort hann væri búinn að ákveða með hvaða liði hann ætlar að spila. Zlatan, sem leikið hefur með PSG í Frakklandi undanfarin fjögur ár, verður samningslaus í sumar og getur því samið við hvaða lið sem er.
„Við áttum frábæran tíma saman,“ sagði Zlatan um samskipti hans og Mourinho hjá Inter. Hann bætti við að þegar samstarfi þeirra hjá Inter lauk hafi þeir talað um að vinna saman aftur. „Hvort af því verður veit ég ekki. Við erum góðir vinir og ég hef talað við hann nánast á hverjum degi síðan ég fór frá Inter,“ sagði Zlatan sem staðfesti þó að hann hefði fengið tilboð frá félögum – í fleirtölu – í ensku úrvalsdeildinni.
Hann vildi þó ekki segja til um það hvort eitt þeirra væri Manchester United. Hann sagðist þó vera búinn að ákveða hvar framtíð hans lægi og sagði að það kæmi í ljós fljótlega hvað hann myndi taka sér fyrir hendur.
Þegar hann var spurður hvort Mourinho gæti komið United-liðinu aftur í fremstu röð sagðist Zlatan ekki vera í neinum vafa um það. „Ég held að hann sé maðurinn sem getur komið liðinu aftur á toppinn. Hann hefur náð árangri allsstaðar og veit hvað hann er að gera,“ sagði hann og bætti við að ef félög vilja vinna titla, þá sé best að ráða Mourinho.
