Hjörvar Steinn mætir goðsögninni Nigel Short í sex skáka einvígi um helgina
Helgina 21.–22. maí mætast stórmeistararnir Hjörvar Steinn Grétarsson og Nigel Short í einvígi sem Skákfélagið Hrókurinn skipuleggur í samstarfi við Mót-X. Einvígið fer fram í Salnum í Kópavogi og fá keppendur aðeins 25 mínútna umhugsunartíma á hverja skák, sem býður upp á miklar sviptingar, klukkubarning og spennu. Alls tefla meistararnir sex skákir, fyrst þrjár á laugardaginn og síðan seinni þrjár á sunnudaginn.
Nigel Short er einn þekktasti stórmeistari heims. Hann var undrabarn í skák sem vakti mikla athygli í Bretlandi á sínum tíma og síðar varð hann yngsti alþjóðlegi meistari sögunnar, aðeins fjórtán ára gamall. Stórmeistari varð hann 19 ára gamall og í kjölfarið skipaði hann sér í flokk bestu skákmanna heims. Hápunktinum var náð árið 1993 þegar hann vann sér rétt til þess að skora á sjálfan Garry Kasparov um heimsmeistaratitilinn í skák, þar sem hann þurfti að lúta í gras.
Short lifir athyglisverðu lífi og er afar umdeildur meðal skákmanna þar sem hispurslaus skrif hans um skák og skákmenn hafa hneykslað kollega hans og reitt suma til reiði. Short skilgreindi sjálfan sig sem ólífubónda í Grikklandi einu sinni en þar hefur hann haldið heimili ásamt þarlendri eiginkonu sinni. Hann er þó sífellt á faraldsfæti og hefur sett sér það markmið að ferðast til allra landa á jarðarkringlunni. Þá hefur hann staðið uppi sem sigurvegari á fjórða tug skákmóta í sex heimsálfum en hann hefur leitað logandi ljósi að tækifæri til þess að tefla á skákmóti sem skipulagt er á Suðurskautslandinu. Það gæti ræst fyrr en seinna. Þá ber að geta þess að í lokahófi einvígisins, sem fram fer á skemmistaðnum Húrra á sunnudagskvöldið, mun Short síðan stíga á svið sem söngvari í skák-rokkbandinu b4 ásamt vel völdum íslenskum tónlistarmönnum. Það verður eflaust athyglisverð stund!
Hjörvar Steinn Grétarsson er eitt mesta efni sem komið hefur fram hérlendis en hann fæddist sama ár og Short glímdi við Kasparov um heimsmeistaratitilinn. Hjörvar Steinn skaraði fram úr jafnöldrum sínum frá fyrstu tíð og erfitt er að halda tölu á öllum þeim Reykjavíkur-, Íslands- og Norðurlandameistaratitlum sem hann hefur sankað að sér í gegnum árin. Aðeins tvítugur að aldri var hann útnefndur stórmeistari í skák og er núna næststigahæsti skákmaður landsins með 2.580 stig.
„Það er mikill fengur að heimsókn Shorts og mjög spennandi að sjá glímu hans við Hjörvar Stein. Short er einhver litríkasti og frumlegasti skákmaður heims og hefur verið í sviðsljósinu frá því hann var barn. Hann teflir afar skemmtilega og því mega áhorfendur á MótX-einvíginu búast við fjöri og sviptingum. Einvígið fer fram við bestu hugsanlegu aðstæður í Salnum í Kópavogi og ég hvet áhugamenn á öllum aldri til að koma og fylgjast með veislunni. Það er ókeypis inn og við bjóðum unga skákáhugamenn sérstaklega velkomna,“ segir Hrafn Jökulsson, forseti skákfélagsins Hróksins.