Niðurstaða réttarrannsóknar, sem staðið hefur yfir undanfarin tvö ár, hefur leitt í ljós að lögregla bar sökina á dauða þeirra 96 sem létust á Hillsborough árið 1989.
Ættingjar fórnarlambanna, sem voru stuðningsmenn Liverpool, grétu af gleði þegar niðurstaðan lá fyrir í morgun. Orsök slyssins og hver bar ábyrgðina hefur löngum verið þrætuepli á Bretlandseyjum. Sumir, meðal annars fulltrúar lögreglu hafa gengið svo langt að segja að ólæti stuðningsmannanna sjálfra hafi orsakað slysið. Nú liggur niðurstaða réttarrannsóknar hins vegar fyrir – og hún er skýr: Mistök lögreglu leiddu til slyssins.
Slysið varð sem fyrr segir á Hillsborough-vellinum á meðan undanúrslitaleikur Liverpool og Nottingham Forest stóð yfir þann 15. apríl 1989. 96 létust í slysinu og 766 slösuðust. Mistök voru gerð þegar áhorfendum var hleypt inn á Leppings Lane-áhorfendasvæðin sem voru yfirfull. Niðurstaða réttarrannsóknarinnar leiddi meðal annars í ljós að mistök hjá yfirmönnum lögreglu, sem fyrirskipuðu að hlið á vellinum skildu opnuð, hafi valdið slysinu og þá hafi öryggismálum verið ábótavant á Hillsborough-vellinum. Lögregla hafi sýnt að sér vanrækslu og ekki hefði verið hægt að kenna stuðningsmönnum um hvernig fór.
Nefnd sem framkvæmdi réttarrannsóknina hlustaði á vitnisburð hátt í þúsund áhorfenda sem voru á vellinum þegar slysið varð.