Orðrómur um endurkomu – Fyrirlestri sem hann átti að halda í Bolungarvík frestað
Orðrómur er á kreiki þess efnis að Ólafur Stefánsson, besti handboltamaður Íslandssögunnar, dragi fram skóna og verði með Valsmönnum í oddaleik liðsins gegn Fram í 8-liða úrslitum Olís-deildar karla í handbolta.
Það sem rennir stoðum undir þennan orðróm eru til dæmis ummæli Óskars Bjarna Óskarssonar, þjálfara Vals, á mbl.is í dag þess efnis að Ólafur sé löglegur með liðinu. Hann vildi þó ekki svara, af eða á, hvort Ólafur yrði með liðinu í kvöld.
„Ólafur er löglegur með okkur og lék meira að segja einn leik með okkur fyrir áramótin,“ sagði Óskar, en meiðsli herja á leikmannahóp Vals fyrir leikinn gegn Fram. Þannig meiddist Ómar Ingi Magnússon í síðasta leik liðanna og verður hann ekki meira með á tímabilinu.
Annað sem þykir renna stoðum undir það að Ólafur verði til taks í kvöld er sú staðreynd að fyrirlestri sem Ólafur átti að halda í Bolungarvík í kvöld var frestað. Fyrirlesturinn átti að fara fram í Félagsheimilinu Bolungarvík, en samkvæmt frétt BB.is hefur honum verið frestað.
Ef svo fer að Ólafur rífi fram skóna á nýjan leik er ljóst að um mikinn hvalreka er að ræða fyrir Valsmenn sem lentu í 2. sæti deildarkeppninnar í vetur.
