Réttarhöld yfir leikmanni Sunderlands hófust í dag- – Neitar tveimur ákæruliðum af fjórum
Adam Johnson, leikmaður Sunderlands og enska landsliðsins í knattspyrnu, viðurkenndi fyrir rétti fyrr í dag að hafa misnotað barn en réttarhöld yfir Johnson standa nú yfir.
Frá þessu greina breskir miðlar en réttarhöld vegna málsins hófust í Bradford á Englandi í morgun.
Johnson, sem er 28 ára gamall og spilar fyrir enska úrvalsdeildarliðið Sunderland, er meðal annars ákærður fyrir að hafa tekið þátt í kynferðislegum athöfnum með 15 ára stúlku.
Johnson er ákærður í fjórum liðum og játaði hann sök í tveimur þeirra fyrir réttarhöldin í morgun. Hann játaði að hafa misnotað barn og að hafa tælt stúlku undir lögaldri.
Johnson neitar sök í hinum tveimur ákæruliðunum sem snúast um að hann hafi ítrekað brotið gegn sömu stúlkunni.
Johnson er fæddur í Sunderland á Englandi en hóf ferill sinn sem atvinnumaður í knattspyrnu hjá Middlesbrough. Þaðan fór hann til Manchester City áður en Sunderland keypti hann fyrir 10 milljónir punda árið 2012.
Johnson hefur einnig spilað 12 leiki fyrir enska landsliðið í knattspyrnu.