Margir spá því að Real Madrid verði fyrsta liðið til að verja Meistaradeildartitilinn í knattspyrnu, enda hefur liðið spilað vel undir stjórn Zinedine Zidane á tímabilinu.

Real bar sigurorð af Atletico Madrid í úrslitaleik keppninnar í fyrra eftir vítaspyrnukeppni. Dregið verður í 16-liða úrslit Meistaradeildarinnar á mánudag og þar gæti Real, sem lenti í öðru sæti í sínum riðli, mætt nokkrum sterkum mótherjum. Eitt er þó lið sem Zinedine Zidane vill helst af öllu forðast að mæta.

„Ég hef ekki leitt hugann sérstaklega að drættinum. Ég vildi toppsætið og við gerðum allt sem við gátum til að landa því,“ sagði Zidane eftir 2-2 jafnteflið gegn Dortmund í vikunni. Þegar hann var spurður hvort hann vildi forðast eitthvað lið í drættinum á morgun, sagði Frakkinn:

„Við sjáum hvað setur. Ég vil ekki mæta Juventus af tveimur ástæðum en það er ekki í okkar höndum hvað gerist,“ sagði Zidane en önnur ástæðan er líklega sú að hann lék lengi vel með Juventus áður en hann gekk í raðir Real Madrid. Hin ástæðan er líklega sú að Juventus-liðið er geysilega vel mannað og þá sérstaklega í öftustu víglínu.

Þess má geta að auk Juventus gæti Real Madrid dregist gegn Arsenal, Napoli, Monaco og Leicester.